168*…se disea.

168*…se disea:

‘N sol par sas = splende il sole.

L’èra ora. L’è rivà ‘l sol. Dopo tanti dì de piova e de cativo ténp, se sugon su ‘n fià. L’èra ora. ‘L sol ‘l gnen entro casa. Se vèrde porte e fenèstre par parar fora l’umidìz. Se buta fora le cuèrte che le ciape ‘l sol. Tut ‘l par pì ciaro e lustro, te gnen voia de far calcosa. Anca i panegàs i se à acòrt che l’è canbià ‘l ténp e i è quà de fora, su’l prà, che i beca su le fregole che ghe ò sgorlà dò da la tavaia.

‘L gat ‘l dorme destirà su ‘na piera. I oc i se tira, co ‘l bèc, le piume, anca lori par sugarse su. Speron che sto sol ‘l dure. Me toca dir. Noi, qua a Polpet, sion su ‘na tera benedeta. No avon crode che se move e che gnen do, la Piave, anca se grosa e brontolona, la è distante e dò bas le rive.

Penson alora a quei poareti, veci, fioi grandi e picioi, pare e mare, che par colpa de stà piova i è fora de casa soa, senza gnent, ‘l fret che i speta che calchedun ghe dae ‘na man par pararse de sta desgrazia e cò tanta voia de poder tornar a casa soa presto, par veder cosa che la asà de mal stà acua, na olta che la se sarà sugada su. ‘N regordo e ‘na preghiera e che de stè desgrazie no ne toche vederghen pì.

167*…se disea:

167*…se disea:

Le fontane de ‘l Pian de Vedoia.

Co ère picinìn, a i ani de la guèra, ogni tant, ‘l pi de le olte distà, ‘ndée a star su ‘l Pian de Vedoia, da me noni. La casa de i me noni la èra su ‘l col, sot le crode, de éntro de le sbare che serea le sine de la ferovia.

Me pense che fora de le sbare e de là de ‘l stradon, darénte a la osteria, a quei ani, de siora Regina, èra ‘na fontana bèla granda. L’avéa doi brént. Un squasi quadrato, co le piere su drete, co la candola negra e i doi fèr, lustri, par poiar sora i seci par ciapar l’acua da bere e ‘l servia anca par bearar le vache. Quelaltro, ‘n fià pi bas, co le piere che ‘ndea in do e ‘l gnea doperà solche da le femene par lavar. Co se pasea fora le sbare co ‘l car par ‘ndar a cargar fien o patate vedee sempro femene de ‘l Pian che lavea e a la sera se vedea le vache che i paroni i portea a bearar.

Un de stì di parlee co ‘na siora de ‘l Pian de sta fontana e ela la me contea che entro ‘nte ‘l cortìgol èra ‘naltra fontana, pì piciola, quadrata, che la servia solche a ciapar l’acqua par bere.

Mi no me pense de stà fontanela e me piasaria catar magari ‘n ritràto, ma so che no sarà fazil parchè a quei ani era altro da far e po squasi nesun avéa la machineta e anca chi che i lo avése avuda i lo avaria, de zerto, doperada par far ‘l ritràto de i so parent pitòst che tirar do ‘na fontana.

166*…se disea:

166*…se disea:

Son ciapà mal.

Son ciapà mal. Me inacorde che co leve su la matina, me fa mal dapartut, pi de tut le corde de ‘l col.

Par farme pasar sti doloret, a le olte, cioe su la cana e vae a pescar fora par la Piave, ma a caminar co i stivai su par i sas me fa mal i piè e co ò fat ‘n pochi de lanci, la cana la me pesa e me gnen mal ‘na spala.

Anca se spache su legne me gne fora ‘l mal de schena e me fa mal la spala.

Co vae ‘n Santandrea po, me toca andar pian, pian, se no me manca ‘l fià e reloio ‘l taca a far bit, bit, parchè me sbate masa ‘l cor.

Me son ciot le scarpe doi numeri pì grande, parchè se no, co camine, me fa mal i piè.

Anca a caminar stae atento de non pender masa se nò me fa mal le ganbe e me gnen i sgranf.

Ogni tant pense: ma che malatia avroe? No me ocore ‘ndar da ‘l Dotor par saver come che la se ciama sta malatia o che mal che ò, me basta sentir cosa che i dis, ‘n talian, i me neodi co ghe conte ste robe: “sei vecchio, nonno, sei vecchio!”. Quanta rason che avè, cari i me boce!

165*…se disea:

165*…se disea:

Susta = Molla

Una de stè feste, ‘ntant che se magnea, ò sentì me fiol pì doven dirghe a me neodo: “Me par che te se dò de susta!”. De fato, stò bocia, l’èra pién de pensieri tant che ‘l parea propio stuf. Me son fat meraveia che me fiol ‘l doperese ‘n dir cusì fora da ‘l so tenp, volee domandarghe come, ma ò asà perder e inveze ò pensà quante olte che i nostri veci i doperea, in te ‘na maniera o in te ‘n altra, sta vecia parola. Intant mete dò ste quà che me gneste a ment.

Co se fermea la sveglia, i disea: “varda che la sveglia la è dò de susta!

Co le femene le fea ‘l let le ghe dea ‘n per de ‘ncalcade a i stramaz par veder se le suste l’èra tute a posto.

Co un ‘l piandea i disea: ‘l susta.

Co ‘l piciol ‘l piandea tant, i disea: rincurelo se no ghe gnen ‘l suston.

Co un ‘l se inrabiea i disea: a l’è sustà.

Co i bocete i fea danàr la mare la disea: no ste farme sustàr se no ve dae.

Se qualchedun che, fursi, ledarà stè quatro righe, ghe gnerà a ment altre situazion ‘ndè che i doperea sta parola e i me lo farà saver, ‘l me faria propio ‘n piazer.

 

164*…se disea:

164*…se disea:

L’an de la fan. III°

‘Ancoi, ‘n amigo ‘l me à portà ‘n libret piciol, ros, co su scrit “rime a Polpet” e sot “comitato frazionale Polpet – 2012” e, entro, ò vist che ghe avea mes le man anca la siora Marisa Fanna Costantini.

L’ò let tut de ‘n fià e, varda caso, ò catà ‘na poesia de Massimo Zilli, nasest qua da noi, migrante, mort su par ‘l Trentin, ma che l’à olest eser sepulì fora ai Maraga, quà a Polpet.

Me pense anca mi de Massimo Zilli, poeta e pitor, amigo, coscritto e parent de me misier. Co ‘l gnea dò da i so paes no ‘l manchea mai de rivar a catar ‘l so parent capeler e, anca se me misier era un de poche parole, i se fea de le gran ciacolade.

La poesia la parla de la liberazion de Polpet e la recorda doi fati veri capitadi quà e menzonadi anca da altri.

Me par iust, a la fin de stò an, l’an de la fan, che po’ l’è deventà l’an de la vitoria, anca se la fan la è restada ancora par ‘n bel toc, recordar stò nostro paesan che no l’è conosest da i pì doveni e, fursi, poc, anca, da i pì veci.

L’originale è più lungo, ma per motivi di spazio, riporto solo le strofe che interessano i due episodi accaduti a Polpet il 4 novembre 1918, giorno della liberazione del nostro paese.

LA LIBERAZIONE DI POLPET, 1918.

Il nemico………omissis…….gloria.

Quella bandiera sul petto celata

al libero vento viene ridata;

tutta felice l’eroica nonnina

verso gli arditi a stento cammina,

da nessuno vuol farsi aiutare

tutta sola la fa sventolare.

E’ l’imbrunire, il nemico ancor non s’arrende

le ultime forze ancora distende,

cento di loro – su sette dei nostri – scaglia

il tenente muore in battaglia;

pochi rimasti, i nemici ancor tanti

i nostri gridavan “Battaglione avanti!”

L’eroe si chiamava Rodolfo Fiori,

sia il suo nome nei nostri cuori.

Altri periron in quella notte sì scura

dopo aver pugnato con tanta bravura.

Onore ai bersaglieri di quella sera

assieme alla nonna che salvò la bandiera!

Massimo Zilli – Febbraio 1965.

163*…se disea:

163*…se disea:

‘L stagnin = calderaio – stagnaro.

A stà staion, co ère bocia, parlon de i ani de la guera, pasea su e do par le strade, ‘l stagnin. ‘L stagnin l’èra ‘n on che ‘l iustea pignate, stagnàde, seci, calgere, caze e cazot de ran e anca de fer. De solito l’ èra furlan o trentin e ‘l zighea: “fémene, son ‘l stagnin, aviu pignate da iustar?”

‘L girea par tut ‘l paés e co ghe parea de aver ciot su pignat asèi par ‘na dornada de laoro, ‘l se metea ‘n te ‘n canton o su ‘n spiaz e, su ‘l so caret ‘l pinzea ‘l fogo. Su sto caret l’ avea tuti i so arte, e, da na banda ‘n fogher, tut de fer, che ‘l doperea par desfar ‘l stanc.

I arte de ran i lo iustea co ‘l stanc e quei de fer, se i èra fruadi o se èra ‘n buset, ‘l ghe metea ‘n tacon inbrochetà co broche de ran.

Me pense che, a casa nostra, se avea doi seci de ran. Se i doperea par andar, co ‘l zenpedon, a la fontana fora drio, a cior l’acqua par far da magnar e par bever. Un de sti seci ‘l spandea e me mare i ghe lo à dat da iustar. ‘L stagnin l’à dit: “siora ghe n’ala un sol?” E me mare ghe a respondest: “no, doi”. Alora, l’à dit ‘l stagnin: “siora l’ è meio meterli a posto tuti doi. I fa pì bel veder tuti doi savaiàdi”. Me mare la ghe lo à dati tuti doi. Co la sera i lo à portadi ‘ndrio, stì seci no i parea pì gnanca quei! Lustri, co la mantega negra, ‘l fondo stagnà polito, lis, ciaro che sluseghea. Tuta n’altra roba. Me pense che anca me mare l’à dit che l’èra stat brao e par de pì onesto!

 

162*…se disea:

162*…se disea:

‘L mur de ‘l Canpàt = il muro del campo magro.

Su par ‘l troi par ‘ndàr ‘n Sant’Andrea, vanti de rivàr ‘l salt de le slite, l’ è ‘n toc de troi dret e pian. Sora stò troi, sot ‘na croda lisa, l’è ‘n tochet de taren che ‘l se ciama Canpàt. Su stò taren l’è creset ‘na zariesera, doi, tre carpen e ‘n pochi de boscat, ma par i ani pasadi l’era coltivà e ben tegnest. No so che, che a quei ani, se podese semenar, ma me vien da pensar che i metese dò patate. Me par de veder ste femene, co ‘l darlin su le spale, andar su par ‘l troi par portar su ledan a coltivar, e po a svangar, a semenar, a zapar e a la fin, senpro co ‘l darlin, portar dò le patate.

Stò taren l’è tegnest su da ‘n mur de sas. ‘N mur de sas fat su senza gnanca ‘n pel de malta. Sas neti poiadi un sora quel’altro, incastradi, studiadi come ‘n mosaico. Le radise de la zariesera le ghe n’à trat do ‘n toc, ma quel che resta ‘l fa ‘n bel veder. Dret e ben mantegnest, senza ‘n fil de muscio, sas ‘ncora bianchi e neti. Ogni olta che vae su par Sant’Andrea me ferme a vardarlo e pì de tut varde ‘l canton. L’è ancora bel, dret, a pionbo, ‘na meraveia!

Mi pense che sto mur ‘l pose eser anca pi vecio de quel de la ceseta de Sant’Andrea. De fato, conta la storia, che i nostri veci i volea far la ceseta al Canpàt, ma che ogni olta che i tachea a meter dò le fonde i se catea ‘l material ‘n toc pi ‘n su, ‘ndè che l’ è ades Sant’Andrea.